هل ثلاثية GTA المحسنة تعتبر فعلاً محبطة؟ مناقشة ما بعد الإعلان
0%
بعد طول انتظار روكستار كشفت امبارح عن النسخة المحسنة من ثلاثية GTA، وطبعاً كما كان متوقع الاعلان لاقى الكثير من النقد وناس كتير شايفة انها متستحقش يتدفع فيها 60-70 دولار وإن في بالفعل مودات على الـ PC بتقدر تقدم نفس المستوى ده من الجرافيكس.
فهل فعلاً الاعلان كان محبط وروكستار عاملين علينا نصباية؟ طيب خلينا الأول نبص للموضوع من البداية، ونشوف مدى مصداقية روكستار في وعودها عشان نقدر نعرف احباط الناس منطقي ولا لاء.
ايه الفرق بين الريماستر والريميك؟
الأول خلينا نعرف سريعاً الفرق بين مصطلح ريماستر وريميك، وبعدها نشوف ثلاثية GTA ينفع تتحط تحت اني تصنيف، الريماستر هو ببساطة جعل اللعبة بقدر الإمكان معاصرة من ناحية الرسوم، فمتبقاش مثلاً بتلعب الجزء الأول من ماكس بين في 2021 وشايف Sam Lake مبتسم للحياة حتى وهو بيتضرب بالنار، أو متبقاش شايف Lara Croft على هيئة مربعات في الجزء الأصلي من Tomb Raider، كل دي أشياء اللاعب ميقدرش يستحمل يشوفها في عصرنا دلوقتي، فالريماستر هدفه هو انه يزود من صقل اللعبة من ناحية الرسوم ومستويات الإضاءة ومعدل الإطارات ودعم الـ4k .. وملوش أي علاقة تماماً بالجيم بلاي لا من قريب ولا من بعيد، ولا حتى بالميكانيكس .. من الاخر المطوريين بياخدوا نفس الـSource Code بدون أي تعديلات حقيقية.
بالنسبة بقى للريميك، فهو تغيير شامل للعبة، اعتبرها لعبة جديدة تماماً معمولة من الصفر بمحرك جديد، وده شوفناه في ألعاب كتير زي Resident Evil 2 و 3 أو Mafia Remake السنة اللي فاتت، فهتلاقي في النسخ الريميك مش بس الجرافيكس اتغير تماماً، ده الأنميشن وتعابير الوشوش والفيزيائية، لعبة جديدة تماماً .. والتغيير ده بيوصل بردو للجيم بلاي وميكانيكيات اللعب، لذلك طبيعي الألعاب دي تاخد حقها من الدعايا والصرف على إنتاجها زي الألعاب الجديدة بالظبط، مينفعش تلاقي مطور بيعلن عن ريميك لعبة قبل نزولها بشهر!
فبعد ما عرفنا الفرق الشاسع بين الاتنين، GTA تعتبر اني واحدة؟ بالطبع هتكون ريماستر، وده اللي وضحته شركة روكستار فالبداية بدون أي تلاعب في الألفاظ .. والشركة ألتزمت بوعودها بدون أي تأجيل، ده ميمنعش إن في علامات استفهام على سعرها طبعاً ولكن مننساش بردو توفر San Andreas مجاناً على خدمة Game Pass في يوم إطلاقها (الموافق 11 نوفمبر) وتوفر الجزء التالت على PS Now في 7 نوفمبر.
مشكلة المسميات المتشابهة
كجزء من الدعايا والـBranding، الشركات بتستخدم مسميات مختلفة كل مرة، وأحياناً بتتداخل مع بعض وبتلخبط اللاعب وبيبقى مش عارف اذا كان الاعلان عن ريماستر ولا ريميك، والمقصود ايه بالظبط .. فعلى سبيل المثال السنة اللي فاتت ريميك الجزء الأول من مافيا كان اسمه Mafia Definitive Edition، برغم انه ريميك صرف، ومسمى Definitive Edition دايماً بيتقال على الريماستر مش الريميك، ولكن 2K في الغالب اضطرت تسميه كده عشان يتماشى مع مسمى الحزمة كلها وتبقى Mafia The Definitive Edition اللي كانت بتتضمن ريميك الأول وريماستر التاني والجزء التالت بكل الإضافات.
ممكن يختلط الأمر على ناس كتير فيما بعد، لأن لسة مفيش مسميات واضحة وصريحة الشركات ملتزمة بيها .. ولكن قبل الهجوم على أي لعبة لازم نبقى عارفين هي المطلوب منها تقدم ايه وهل قدمته صح ولا كان في تقصير من المطوريين.
