قضاء أوقات الفراغ في الاستمتاع بهواية ألعاب الفيديو من حق أي شخص بغض النظر عن نوع الجنس أو السن أو الحالة المادية، ولكن للأسف محدش من الشركات اللي بتنتج فيديو جيمز عارف الجيمر المصري بيعاني أزاي وكم التضحيات اللي بيقدمها عشان بس يستمر مش فكرة بقى انه يحصل على أفضل قيمة ولا انه يبقى دايما مواكب العصر بأحدث الأجهزة

مشكلة ارتفاع الأسعار 

معنى انك جيمر مصري يعني تستحمل ارتفاع الأسعار اللي ممكن يحصل في أي وقت لو الدولار سعره أرتفع عشان انت في دولة بتستورد أكتر بكتير ما بتصدر اللي في النهاية هيؤدي لتعويم وأسعار الألعاب والأجهزة هتزيد تاني وتالت

وفي الآخر بردو بتشتري رغم إن قيمة الألعاب بتبقى أكبر بكتير من قيمتها في الخارج، لأن لو في أي دولة برا مصر سعر اللعبة بيمثل نسبة أقل من راتب الفرد، في حين اللعبة هنا أو الجهاز نسبتها أعلى بكتير، ودي أول تضحية

مصر غير مدعومة من أغلب شركات الألعاب

معنى انك جيمر مصري يعني متضطر تستحمل انك مش موجود على الخريطة بالنسبة للشركات الكبيرة زي سوني ومايكروسوفت وروكستار يعني ملكش تسعيرة خاصة ببلدك، ومايكروسوفت تقريباً مش بتدعم مصر نهائياً والجهاز حتى مش عليه ضمان من الوكيل

وده رغم إن عدد المهتمين بمجال الألعاب في مصر مش قليل تماماً وبدليل إن شركات الرياضة الالكترونية بدأت تستثمر في مصر وتستقطب اللاعبين الموهوبين ويمكن دي من الحاجات الإيجابية اللي بدأت تحصل الفترة الأخيرة

مشاكل الانترنت واللعب عبر الشبكة

معنى انك جيمر مصري يعني انت بتقدر تميز نفسك بسهولة في أي لعبة مالتي بلاير من خلال انك تشوف مين أعلى واحد في الماتش من ناحية البينج، ورغم ذلك بتخش تعمل أحسن أداء! يعني بتحقق المستحيل رغم إن غيرك عندهم أفضلية عنك كتير

معنى انك جيمر مصري يعني تشيل هم شراء الألعاب وهم تحميلها، لأن على عكس أي دولة في العالم انت شركات الانترنت في بلدك بتتعامل معاك معاملة دول العالم التالت وبينقطوك بجيجات كل شهر ويقولك باقة محدودة واحنا في 2022 ومتوسط مساحة اللعبة الواحدة بقى 50-60 جيجة

آن الأوان إن غير الجيمرز يدركوا إن الألعاب مش للأطفال فقط

معنى انك جيمر مصري يعني بعد ما تشقى ويطلع عينك عشان تجيب الجهاز والألعاب، انت لسة محتاج تقنع أهلك واللي حوالين منك اللي شايفين ان عيب تبقى عديت ال20 سنة ولسة بتلعب! رغم إن الألعاب بقت وسيلة ترفيه موجهة لكل الأعمار والعالم كله قرب يعرف كده، ماعدا احنا تقريباً

ورغم كل ده احنا لسة مكملين، ولسة بنحب الألعاب وعندنا شغف ناحيتها إن مكنش احنا تاني أقوى دولة في العالم العربي اهتماماً بالمجال ده أصلاً، واللي يخلينا نستحمل كل ده ويبقى عندنا الكم ده من الصبر بيثبت قد ايه احنا بنحب الفيديو جيمز فعلاً أكتر من أي حد تاني في العالم